នៅរសៀលថ្ងៃព្រហស្បតិ៍ ១៣កើត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី១៦ ខែឧសភា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញទទួលព្រះរាជដំណើរមាតុភូមិនិវត្តន៍របស់ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត។

អញ្ជើញទទួលព្រះរាជដំណើរព្រះករុណាព្រះមហាក្សត្រនាឱកាសដ៏វិសេសវិសាលនេះ រួមមានសម្ដេចប្រធានព្រឹទ្ធសភា សម្ដេចប្រធានរដ្ឋសភា សម្ដេចនាយរដ្ឋមន្ត្រី មន្ត្រីជាន់ខ្ពស់ព្រឹទ្ធសភា រដ្ឋសភា រាជរដ្ឋាភិបាល មន្ត្រីព្រះបរមរាជវាំង ព្រះរាជវង្សានុវង្ស និងថ្នាក់ដឹកនាំស្ថានទូតចិនប្រចាំនៅកម្ពុជា។

ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចកម្ពុជា ព្រះអង្គស្ដេចបានយាងបំពេញព្រះរាជបេសកកម្មចូលរួមវេទិការអរិយធម៌អាស៊ីលើកទី១ នៅរដ្ឋធានីប៉េកាំង ចាប់ពីថ្ងៃទី១៣ ដល់ថ្ងៃទី១៦ ខែឧសភា។ ព្រះអង្គក៏បានជួបពិភាក្សាទ្វេភាគីជាមួយឯកឧត្តម ប្រធានាធិបតីចិន ស៊ី ជីនពីង ដែរ៕