សារសម្តេចក្រឡាហោម ស ខេង ផ្ញើជូនប្រជាពលរដ្ឋដែលរងគ្រោះដោយខ្យល់កន្ទ្រាក់នៅក្នុងខេត្តបាត់ដំបង
រយៈពេលពីរថ្ងៃគឺថ្ងៃទី២១និង២២ខែមេសាឆ្នាំ២០១៩នេះ គ្រោះធម្មជាតិដោយខ្យល់កន្ត្រាក់ បានកើតឡើងចំនួន៧លើក ក្នុងស្រុកចំនួន៧ របស់ខេត្តបាត់ដំបង រួមមានក្រុងបាត់ដំបង ស្រុកបាណន់ ស្រុកមោងឬស្សី ស្រុកគាស់ក្រឡ ស្រុករតនមណ្ឌល ស្រុកថ្មគោល និងស្រុកសង្កែ ដែលបណ្តាលឲ្យ ប្រជាពលរដ្ឋ ៥២១គ្រួសារ(តួលេខបឋម) ទទួលផលប៉ះពាល់ និង ខូចខាតផ្ទះសម្បែងចំនួន៣២៩ខ្នង សាលារៀន២ខ្នង អាគារក្នុងវត្ត២ខ្នង និងបណ្តាលឲ្យមនុស្សរងរបួសចំនួន៧នាក់ ក្នុងនោះរបួសធ្ងន់ម្នាក់ ដោយបានបញ្ជូនទៅសម្រាកព្យាលនៅមន្ទីរពេទ្យបង្អែកខេត្ត។
ខ្ញុំសូមចូលរួមសោកស្តាយ និង រំលែកទុក្ខលំបាករបស់បងប្អូនប្រជាពលរដ្ឋ ខេត្តបាត់ដំបងទាំងអស់ដែលរងគ្រោះថ្នាក់ដោយបាតុភូតធម្មជាតិខ្យល់កន្ត្រាក់នេះ ។
ស្ថិតក្នុងស្ថានភាពនេះខ្ញុំបានណែនាំ និង បានអំពាវនាវដល់ មន្ត្រីពាក់ព័ន្ធគ្រប់ផ្នែកទាំងអស់ ត្រូវយកចិត្តទុកដាក់ជួយជាបន្ទាន់ដល់ប្រជាពលរដ្ឋដែលកំពុងទទួលរងគ្រោះធម្មជាតិនេះ ជាពិសេស ត្រូវជួយរៀបចំផ្ទះសម្បែង ឬ ទីជម្រក សម្រាប់ពួកគាត់ឡើងវិញ និង ដោះស្រាយការលំបាកនានា ទៅតាមភាពជាក់ស្តែង និង លទ្ធភាពដែលមានស្រាប់ ហើយខ្លួនខ្ញុំនឹងទៅជួបសួរសុខទុក្ខបងប្អូនផ្ទាល់នៅកន្លែងណាមួយនាពេលឆាប់ៗខាងមុខនេះ ។
ខ្ញុំក៏សូមអំពាវនាផងដែរដល់មន្ត្រីអាជ្ញាធរខេត្តបាត់ដំបង ក៏ដូចជាខេត្តដ៏ទៃទៀតទូទាំងប្រទេស ត្រូវយកចិត្តទុកដាក់ផ្តល់ព័ត៌មានឲ្យបានរហ័សបន្ទាន់តាមតែអាចធ្វើបានជូនដល់ប្រជាពលរដ្ឋដើម្បីបង្ការគ្រោះថ្នាក់ពីគ្រោះធម្មជាតិខ្យល់កន្ត្រាក់នេះ និង សូមអំពាវនាវដល់ប្រជាពលរដ្ឋគ្រប់រូប ត្រូវមានការប្រុងប្រយ័ត្ន និង មិនត្រូវធ្វេសប្រហែសឡើយ ចំពោះគ្រោះធម្មជាតិនេះ ដូចជានៅពេលដែលមានខ្យល់ និង ភ្លៀងធ្លាក់ ត្រូវបិទឬមិនត្រូវប្រើទូរស័ព្ទ វិទ្យុ ទូរទស្សន៍ និង គ្រឿងអេឡិចត្រូនិចទៀត ហើយអ្នកដែលកំពុងប្រកបកិច្ចការនៅតាមទីវាលត្រូវរកកន្លែងដែលមានសុវត្ថិភាពសម្រាប់ជ្រក ដើម្បីចៀសវាងគ្រោះថ្នាក់ដល់រាងកាយ ឬ ការបាត់បង់ជីវិត ៕
![](/public/ckfinder/userfiles/files/2304191/1.jpg)
![](/public/ckfinder/userfiles/files/2304191/2.jpg)
![](/public/ckfinder/userfiles/files/2304191/3.jpg)
![](/public/ckfinder/userfiles/files/2304191/4.jpg)
![](/public/ckfinder/userfiles/files/2304191/5.jpg)
![](/public/ckfinder/userfiles/files/2304191/6.jpg)
![](/public/ckfinder/userfiles/files/2304191/7.jpg)
![](/public/ckfinder/userfiles/files/2304191/8.jpg)
![](/public/ckfinder/userfiles/files/2304191/9.jpg)
![](/public/ckfinder/userfiles/files/2304191/10.jpg)