នៅរសៀលថ្ងៃព្រហស្បតិ៍ ១៤កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែសីហា ឆ្នាំ២០២២នេះ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញចូលរួមពិធីបុណ្យទក្ខិណានុប្បទានគម្រប់ខួប១០០ថ្ងៃ ឧទ្ទិសកុសលជូនដួងវិញ្ញាណក្ខន្ធ សម្ដេចឧត្តមទេពញាណ ហ៊ុន ណេង ប្រារព្ធនៅក្រុងកំពង់ចាម ខេត្តកំពង់ចាម។ 

ពិធីបុណ្យទក្ខិណានុប្បទាននាឱកាសនេះ បានប្រារព្ធឡើងដោយមានវត្តមានអញ្ជើញចូលរួមដ៏ខ្ពង់ខ្ពស់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេច ឯកឧត្តម លោកជំទាវ ជាឥស្សរជនថ្នាក់ដឹកនាំជាតិ ក្រោមជាតិ ក្រុមគ្រួសារ និងញាតមិត្តជិតឆ្ងាយជាច្រើនរូបទៀត។ 

សម្ដេចឧត្តមទេពញាណ ហ៊ុន ណេង ត្រូវជាបងប្រុសបង្កើតសម្ដេចតេជោ ហ៊ុន សែន នាយករដ្ឋមន្រ្តី។ សម្ដេចជាអតីតអភិបាលខេត្តកំពង់ចាម ជាតំណាងរាស្រ្តមណ្ឌលកំពង់ចាម និងជាសមាជិកគណៈកម្មាធិការអចិន្ត្រៃយ៍រដ្ឋសភា។ សម្ដេចបានទទួលមរណភាពដោយរោគាពាធ ក្នុងជន្មាយុ៧២ឆ្នាំ កាលពីថ្ងៃទី៥ ខែឧសភា ឆ្នាំ២០២២ ៕