នាព្រឹកព្រឹកថ្ងៃអង្គារ ១៤រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែមិថុនា ឆ្នាំ២០២២ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បានអញ្ជើញចូលរួមជាគណៈអធិបតីមិទ្ទិញអបអរសាទរខួប៧១ឆ្នាំ ថ្ងៃបង្កើតគណបក្សប្រជាជនកម្ពុជា ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា និងសម្ដេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា នៅវិមាន៧មករា ទីស្នាក់ការកណ្ដាលគណបក្សប្រជាជនកម្ពុជា។ 

ក្រោមអធិបតីភាពសម្ដេចប្រធាន និងប្រធានកិត្តិយសគណបក្ស មិទ្ទិញអបអរសាទរខួប៧១ឆ្នាំ ថ្ងៃបង្កើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២២) នាឱកាសនេះ មានការអញ្ជើញចូលរួមពីសម្ដេច ឯកឧត្តម លោកជំទាវ ជាសមាជិកគណៈអចិន្ត្រៃយ៍គណបក្ស សមាជិកគណៈកម្មាធិការកណ្ដាលគណបក្ស ថ្នាក់ដឹកនាំ និងសមាជិកសមាជិការគណបក្សគ្រប់ថ្នាក់ ព្រមទាំងភ្ញៀវកិត្តិយសជាឯកអគ្គរាជទូត ឯកអគ្គរដ្ឋទូតនៃប្រទេសនានាប្រចាំនៅកម្ពុជា ជាច្រើនរូបទៀត។ 

អញ្ជើញថ្លែងសន្ទរកថានាឱកាសដ៏អធិកអធមនោះ សម្តេចអគ្គមហាសនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តីនៃកម្ពុជា បានគូសបញ្ជាក់ថាចាប់ពីថ្ងៃបដិសន្ធិមក គណបក្សប្រជាជនកម្ពុជា បានរក្សាខ្ជាប់ឥតប្រែប្រួលនូវអត្តសញ្ញាណរបស់ខ្លួន ជាគណបក្សរបស់ប្រជាជន អាស្រ័យដោយប្រជាជន និងដើម្បីប្រជាជន ពុះពារឆ្លងកាត់រាល់ ឧបសគ្គនៅគ្រប់ដំណាក់កាល សម្រេចបានសមិទ្ធផលជាប្រវត្តិសាស្ត្រយ៉ាងធំធេងដែលមាន អត្ថន័យជ្រាលជ្រៅបំផុតចំពោះការឋិតថេរគង់វង្ស និងចម្រើនរុងរឿងនៃមាតុភូមិកម្ពុជា។ 

សម្តេច បានរម្លឹកថាក្នុងរយៈពេល៧១ឆ្នាំមកនេះ កម្ពុជាបានឆ្លងកាត់ដំណាក់កាលជាប្រវត្តិសាស្ត្រយ៉ាងច្រើន ទាំងដំណាក់កាលប្រកបដោយមោទនភាពផង ទាំងដំណាក់កាលប្រកបដោយភាពបត់បែន លំបាកស្មុគស្មាញ និងគ្រោះថ្នាក់ជាទីបំផុតផង ប៉ុន្តែទោះបីស្ថិតក្នុងកាលៈទេសៈណាក្ដីក៏ គណបក្សប្រជាជនកម្ពុជានៅតែរក្សាខ្ជាប់នូវគោលបំណង និងឧត្តមគតិរបស់ខ្លួន ដើម្បីកសាង និងការពារប្រទេសកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និង វឌ្ឍនភាពសង្គម។ 

សូមបញ្ជាក់ថាមិទ្ទិញអបអរសាទរខួប៧១ឆ្នាំ ថ្ងៃបង្កើតគណបក្សប្រជាជនកម្ពុជាដែលប្រារព្ធឡើងនាថ្ងៃនេះ បានប្រព្រឹត្តទៅក្នុងបរិយាកាសប្រកបដោយមហាឱឡារិកបន្ទាប់ពីខកខានប្រារព្ធអស់រយៈពេល២ឆ្នាំជាប់គ្នា គឺនៅឆ្នាំ២០២០ និងនៅឆ្នាំ២០២១ ដោយសារការរីករាលរាលនៃជំងឺកូវីដ-១៩។ ដូចការប្រព្រឹត្តិទៅនៃសកម្មភាពសេដ្ឋកិច្ច និងសង្គមទូទៅដែរ លទ្ធភាពនៃការរៀបចំមិទ្ទិញនាថ្ងៃនេះក៏ជាមនុញ្ញផលកើតចេញពីប្រសិទ្ធភាពនៃការបង្ការទប់ស្កាត់ការឆ្លងរីករាលជំងឺឆ្លងនេះរបស់រាជរដ្ឋាភិបាលនៃគណបក្សប្រជាជនកម្ពុជាដែលកើតចេញពីការបោះឆ្នោតគាំទ្ររបស់ប្រជាពលរដ្ឋ ៕