សម្ដេចក្រឡាហោម ស ខេង សូមថ្លែងអំណរព្រះគុណនិងអរគុណ ប្រគេនព្រះសង្ឃ និងជូនសម្ដេច ឯកឧត្តម លោកជំទាវ ជនរួមជាតិដែលបានចូលរួម​ និងផ្ញើសារចូលរួមរំលែកមរណទុក្ខក្នុងឱកាសប្រកបដោយសេចក្ដីក្រៀមក្រំដែលឧបាសិកា ស ស៊ន់ ត្រូវជាបងស្រីបង្កើតរបស់សម្ដេចបានទទួលមរណភាព ពីលោកនេះទៅកាន់លោកខាងមុខ។

ឧបាសិកា ស ស៊ន់ ជាកូនស្រីច្បងក្នុងចំណោមកូនប្រុសស្រីចំនួន៩នាក់របស់លោកឪពុក ស ប៊ិត និងអ្នកម្ដាយ ម៉ក់ សែម។ ឧបាសិកាបានទទួលមរណភាពកាលពីវេលាម៉ោង២១និង៤៥នាទីយប់ ថ្ងៃទី២៤ ខែវិច្ឆិកា ឆ្នាំ២០២១ ក្នុងជន្មាយុ ៧៤ឆ្នាំ ដោយជរាពាធ។ សពឧបាសិកាត្រូវបានតម្កល់ធ្វើបុណ្យតាមគន្លងព្រះពុទ្ធសាសនា នៅគេហដ្ឋានក្នុងខណ្ឌសែនសុខ រាជធានីភ្នំពេញ។

នៅព្រឹកថ្ងៃសៅរ៍ ទី២៧ ខែវិច្ឆិកា ឆ្នាំ២០២១នេះ សម្ដេចក្រឡាហោម ស ខេង ព្រមទាំងក្រុមគ្រួសារនឹងប្រារព្ធកិច្ចដង្ហែរសពឧបាសិកា ស ស៊ន់ ពីគេហដ្ឋានឆ្ពោះទៅកាន់ឈាបនដ្ឋានដែលជាទីរៀបចំកិច្ចបូជាសពនៅមុខវត្តបុទមវត្តី រាជធានីភ្នំពេញ។

ថ្វីដ្បិតបានធ្វើមរណកាលទៅកាន់លោកខាងមុខហើយក្ដី ប៉ុន្តែសេចក្ដីល្អរបស់ឧបាសិកានឹងស្ថិតនៅអមតៈជាមួយបងប្អូនកូនចៅ និងសង្គមជាតិ ហើយកុសលដែលឧបាសិកាបានសន្សំ និងផលបុណ្យដែលក្រុមគ្រួសារបានបំពេញនឹងជួយដួងវិញ្ញាណក្ខន្ធឧបាសិកាបានទៅកាន់ទីឋានសុខស្ងប់កុំបីឃ្លៀងឃ្លាតឡើយ៕