សម្តេចក្រឡាហោម ស ខេង បានអនុញ្ញាតឲ្យនិស្សិតខ្មែរដែលជាប់អាហារូបករណ៍ទៅសិក្សានៅប្រទេសនូវែលហ្សេឡង់ចូលជួបសម្តែងការគួរសម
នារសៀលថ្ងៃព្រហស្បតិ៍ ១២កើត ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែមករា ឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអនុញ្ញាតឲ្យនិស្សិតខ្មែរដែលជាប់អាហារូបករណ៍ទៅសិក្សានៅប្រទេសនូវែលហ្សេឡង់ចូលជួបសម្តែងការគួរសម និងផ្តល់អនុសាសន៍មួយចំនួនមុនពួកគាត់ទៅបន្តការសិក្សានៅប្រទេសនូវែលហ្សេឡង់។
ថ្លែងនៅក្នុងកិច្ចជំនួបនោះ សម្តេចក្រឡាហោម ស ខេង បានផ្តល់អនុសាសន៍ដល់និស្សិតទាំងអស់ត្រូវខិតខំរៀនសូត្រ និងយកចំណេះដឹងមកចូលរួមបំរើសង្គមជាតិ ឲ្យកាន់តែរីកចម្រើនថែមទៀត លើជំនាញដែលបានសិក្សា ទោះបីជាបម្រើការងារនៅក្នុងស្ថាប័នរដ្ឋ ឬឯកជនក្តី ។
សម្តេចបានបញ្ជាក់ប្រាប់ដល់និស្សិតទាំងនោះទៀតថា ជាធម្មតានិស្សិតកម្ពុជាតែងតែទៅបន្តការសិក្សានៅក្រៅប្រទេសក្រោយពីពួកគាត់ប្រឡងជាប់អាហារូបករណ៍ជាក់ស្តែងដូចកូន ក្មួយនាពេលនេះយ៉ាងដូច្នេះដែរ។ ដូច្នេះហើយបន្តសាមគ្គីភាពជាមួយគ្នាទាំងក្រៅប្រទេស និងក្នុងប្រទេស បើមានឱកាសជួយសាបព្រួសនូវអ្វីដែលជាអរិយធ៌ម វប្បធ៌មល្អរបស់កម្ពុជា ទៅដល់បរទេស ឲ្យគេបានដឹងពីកម្ពុជា ជាពិសេសត្រូវខិតខំ ថែរក្សា យកចិត្តទុកដាក់ចំពោះសុខភាព ដើម្បីឲ្យមានលទ្ធភាពក្នុងការសិក្សារៀនសូត្រ បានល្អប្រសើរ ទទួលយកចំណេះដឹងមកចូលរួមកសាង និងអភិវឌ្ឍន៍សង្គមនៅកម្ពុជាវិញបន្ទាប់ពីត្រូវបានបញ្ចប់ការសិក្សានៅទីនោះ ៕
