ប្រតិបត្តិតាមអនុសាសន៍ដ៏ខ្ពង់ខ្ពស់របស់សម្ដេចក្រឡាហោម ស ខេង ប្រធានក្រុមការងារចុះជួយមូលដ្ឋានខេត្តបាត់ដំបង និងជាអ្នកតំណាងរាស្ត្រមណ្ឌលបាត់ដំបង និងលោកជំទាវ នៅថ្ងៃអាទិត្យ ៧កើត ខែស្រាពណ៍ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី ១៥ ខែសីហា ឆ្នាំ២០២១នេះ ឯកឧត្តម ខាន់ ម៉ាណេរ តំណាងក្រុមការងារក្រឡាហោមមនុស្សធម៌ បានអញ្ជើញនាំយកម៉ូតូកង់បី ទេយ្យទាន និងរៀបចំចង្ហាន់ប្រគេនព្រះសង្ឃ ព្រមទាំងផ្ដល់អំណោយជូនប្រជាពលរដ្ឋស្ថិតក្នុងតំបន់បិទខ្ទប់។

កិច្ចប្រកបដោយសទ្ធាជ្រះថ្លា និងមហាសប្បុរសធម៌នេះ បានប្រព្រឹត្តទៅដោយមានការអញ្ជើញចូលរួមពី ឯកឧត្តម ច័ន្ទ សុផល ឯកឧត្តម ព្រួញ រិទ្ធថា លោកអេង ភិរុណ រួមជាមួយក្រុមការងារក្រឡាហោមមនុស្សធម៌មួយចំនួនទៀត ក្នុងនោះនៅពេលព្រឹក ក្រុមការងារ បានប្រគេនម៉ូតូកង់បី១គ្រឿង ទេយ្យទាន មួយចំនួន និងបានរៀបចំចង្ហាន់(ស៊ុបគោ)ប្រគេនព្រះសង្ឃចំនួន១០៧អង្គ គង់នៅវត្តធម្មិការាម ហៅវត្តដំពាក់ហ្លួង។

បន្ទាប់មក នៅរសៀលថ្ងៃដដែល ក្រុមការងារក្រឡាហោមមនុស្សធម៌ បានបន្តអញ្ជើញនាំយកអំណោយសម្តេចក្រឡាហោម ស ខេង និងលោកជំទាវ ញ៉ែម សាខន ស ខេង រួមមានអង្ករ មី ទឹកត្រី ទឹកសីអ៊ីវ និងទឹកបរិសុទ្ធ ផ្ដល់ជូនបងប្អូនប្រជាពលរដ្ឋដែលកំពុងស្ថិតក្នុងតំបន់បិទខ្ទប់ ដើម្បីទប់ស្កាត់ការឆ្លងរីករាលដាលជំងឺកូវីដ-១៩ ចំនួន៣០គ្រួសារ នៅក្នុងសង្កាត់ចម្ការសំរោង ក្រុងបាត់ដំបង ខេត្តបាត់ដំបង៕