ក្នុងនាមតំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ប្រធានក្រុមការងារចុះជួយមូលដ្ឋានខេត្តបាត់ដំបង និងជាអ្នកតំណាងរាស្រ្តមណ្ឌលបាត់ដំបង ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន, ឯកឧត្តម អ៊ុក គង់ សមាជិកព្រឹទ្ធសភា និងឯកឧត្តម ច័ន្ទ សុផល អ្នកតំណាងរាស្រ្តមណ្ឌលបាត់ដំបង ព្រមទាំងសហការី បាននាំយកអំណោយសម្ដេចក្រឡាហោម និងលោកជំទាវ ចែកជូនប្រជាពលរដ្ឋមានការខ្វះខាតក្នុងជីវភាពចំនួន១៣០គ្រួសារ មកពីឃុំចំនួន៣ នៃស្រុកសំឡូត ខេត្តបាត់ដំបង។

ប្រជាពលរដ្ឋដែលបានអញ្ជើញមកទទួលអំណោយសម្ដេចក្រឡាហោម ស ខេង និងលោកជំទាវ ញ៉ែម សាខន ស ខេង នាឱកាសនេះ រួមមានមកពីឃុំសំឡូតចំនួន៤០គ្រួសារ ឃុំមានជ័យ ចំនួន៤០គ្រួសារ និងឃុំអូរសំរឹល ចំនួន៥០គ្រួសារ។

ពួកគាត់សុទ្ធតែជួបការខ្វះខាតក្នុងជីវភាពនាអំឡុងពេលនៃការរីករាលដាលជំងឺកូវីដ-១៩ ដោយក្នុងមួយគ្រួសារទទួលបានអង្ករចំនួន១ការ៉ុង, មីចំនួន១កេស, ត្រីខចំនួន១យួរ, ទឹកស៊ីអ៊ីវ និងទឹកត្រីចំនួន១យួរ, ទឹកសុទ្ធចំនួន៥យួរ ព្រមទាំងម៉ាស់ និងអាល់កុលមួយចំនួនទៀត ៕