ក្នុងនាមតំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបាត់ដំបង កាលពីថ្ងៃទី២៤ ខែតុលា ឆ្នាំ២០២០​ ឯកឧត្តម​ នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកឯកភ្នំ ខេត្តបាត់ដំបង បានដឹកនាំសហការី ចុះសួរសុខទុក្ខ និងនាំយកអំណោយសម្ដេចក្រឡាហោម និងលោកជំទាវ ចែកជូនបងប្អូនប្រជាពលរដ្ឋរងគ្រោះដោយជំនន់ទឹកភ្លៀង ក្នុងស្រុកឯកភ្នំ ខេត្តបាត់ដំបង។

ឯកឧត្តម នាយឧត្តមសេនីយ៍អគ្គនាយក បានមានប្រសាសន៍ជម្រាបជូនបងប្អូនប្រជាពលរដ្ឋអំពីការយកទុកដាក់ខ្ពស់របស់សម្ដេចក្រឡាហោម ស ខេង និងលោកជំទាវ ចំពោះសុខទុក្ខក្នុងជីវភាពប្រចាំថ្ងៃរបស់ប្រជាពលរដ្ឋ ជាពិសេសនៅក្នុងស្ថានភាពដែលបងប្អូនកំពុងរងគ្រោះដោយជំនន់ទឹកភ្លៀង និងក៏បន្ទាប់ពីទឹកជំនន់បានស្រកត្រឡប់ទៅវិញ ដោយសម្ដេច បានណែនាំឱ្យក្រុមការងារចុះសហការជាមួយអាជ្ញាធរមូលដ្ឋានអនុវត្តវិធានការជួយសង្គ្រោះ និងត្រៀមបង្កាបញ្ហានានាជូនបងប្អូនឱ្យបានទាន់ពេលវេលា។

ឯកឧត្តម នាយឧត្តមសេនីយ៍អគ្គនាយក និងសហការី បានអញ្ជើញចែកជូនអំណោយជាសម្ភារប្រើប្រាស់ និងគ្រឿងបរិភោគរបស់សម្ដេចក្រឡាហោម និងលោកជំទាវ ដល់បងប្អូនប្រជាពលរដ្ឋរងគ្រោះដោយជំនន់ទឹកភ្លៀង នៅក្នុងស្រុកឯកភ្នំ ខេត្តបាត់ដំបង ក្នុងនោះរួមមាន ថ្នាំពេទ្យ តង់កៅស៊ូ ព្រមគ្រឿងឧបភោគ បរិភោគមួយចំនួនទៀត៕