នៅល្ងាចថ្ងៃពុធ ១១កើត ខែផល្គុន ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៤ ខែមីនា ឆ្នាំ២០២០នេះ សម្ដេចក្រឡហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញដឹកនាំគណៈប្រតិភូជាន់ខ្ពស់ក្រសួងមហាផ្ទៃ ធ្វើដំណើរដល់អាកាសយានដ្ឋានអន្តរជាតិវ៉ាត់តី ប្រកបដោយសុវត្ថិភាព ក្នុងដំណើរបំពេញទស្សនកិច្ចការងារ នៅទីក្រុងវៀងច័ន្ទ នៃសាធារណរដ្ឋប្រធិបតេយ្យប្រជាមានិតឡាវ។

ទស្សនកិច្ចសម្ដេចក្រឡាហោម ស ខេង ឧបនាយករដ្ឋមន្ត្រី ពីថ្ងៃទី៤ ដល់ថ្ងៃទី៦ ខែមីនានេះ ធ្វើឡើងតបតាមការអញ្ជើញរបស់ឯកឧត្តមឧត្តមសេនីយ៍ឯក វិល័យ ឡាខាំហ្វង រដ្ឋមន្ត្រីក្រសួងសន្តិសុខសាធារណនៃសាធារណរដ្ឋប្រជាធិបតេយ្យប្រជាមានិតឡាវ ដើម្បីចូលរួមជាសហប្រធានដឹកនាំកិច្ចប្រជុំពិនិត្យវាលយតម្លៃលទ្ធផលនៃការអនុវត្តកំណត់ហេតុសហប្រតិបត្តិការឆ្នាំ២០១៩ និងចុះហត្ថលេខាលើកំណត់ហេតុនៃកិច្ចសហប្រតិបត្តិការឆ្នាំ២០២០។

អញ្ជើញទទួលបដិសណ្ឋារកិច្ចសម្ដេចក្រឡាហោម ស ខេង ឧបនាយករដ្ឋមន្ត្រី និងគណៈប្រតិភូអមដំណើរ នៅអាកាសយានដ្ឋានអន្តរជាតិវ៉ាត់តីនាឱកាសនោះ រួមមានឯកឧត្តម ស៊ុមវ៉ាំង ថាំម៉ាស៊ីត អនុរដ្ឋមន្ត្រីក្រសួងសន្តិសុខសាធារណនៃសាធារណៈរដ្ឋប្រជាធិបតេយ្យប្រជាមានិតឡាវ នាយកខុទ្ទកាល័យ ប្រធាននាយកដ្ឋានទំនាក់ទំនងអន្តរជាតិ ព្រមទាំងក្រុមមន្ត្រីពិធីការ នៃក្រសួងសន្តិសុខសាធារណៈឡាវជាច្រើនរូប៕