នៅព្រឹកថ្ងៃសៅរ៍ ១២រោច ខែកត្តិក ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី២៣ ខែវិច្ឆិកា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ព្រមទាំងឯកឧត្តមលោកជំទាវជាថ្នាក់ដឹកនាំមន្ត្រីរាជការស៊ីវិល និងនគរបាលជាតិនៃក្រសួងមហាផ្ទៃ បានអញ្ជើញគោរពព្រះវិញ្ញាណក្ខន្ធសម្ដេចព្រះរៀម នរោត្តម បុប្ផាទេវី ទេពនាដវដ្ដីឯក នៅវត្តបុទមវតីរាជវរារាម រាជធានីភ្នំពេញ។

ក្នុងបរិយាកាសប្រកបដោយសេក្ដីសោកស្ដាយ និងអាឡោះអាល័យនេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញថ្វាយកម្រងផ្កា និងចារពាក្យពេជន៍ក្នុងសៀវភៅក្រៅមាស ដើម្បីសម្ដែងការគោរពប្រកបដោយសេចក្ដីក្ដុកក្ដួលបំផុត ចំពោះការយាងសោយព្រះទិវង្គតរបស់សម្ដេចព្រះរាជបុត្រី ព្រះរៀម នរោត្តម បុប្ផាទេវី ទេពនាដវដ្ដីឯក និងជាមរតកមនុស្សរស់របស់កម្ពុជា។

សូមរម្លឹកថាសម្ដេចព្រះរាជបុត្រី ព្រះរៀម នរោត្តម បុប្ផាទេវី ទេពនាដវដ្ដីឯក បានយាងសោយព្រះទិវង្គត កាលពីម៉ោង១២ និង៣០នាទីរសៀលថ្ងៃទី១៨ ខែវិច្ឆិកា ឆ្នាំ២០១៩ ក្នុងព្រះជន្ម៧៧ព្រះវស្សា នៅមន្ទីរពេទ្យរាជធានីបាងកកប្រទេសថៃ។ ព្រះសពរបស់ទ្រង់ នឹងត្រូវប្រារព្ធពិធីបូជានៅថ្ងៃទី២៥ ខែវិច្ឆិកា នៅទីព្រះមេរុមុខវត្តបុទមវតីរាជវរារាម៕