នាព្រឹកថ្ងៃសុក្រ ២រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៤ ខែឧសភា ឆ្នាំ២០២៤នេះ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានអញ្ជើញចូលរួមប្រកួតកីឡាវាយកូនហ្គោលមិត្តភាពជាមួយ ឯកឧត្តម វ៉ាង វិនធៀន (H.E. Mr. Wang Wentian) ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា នៅទីលានវាយកូនហ្គោលវឌ្ឍនៈ រីសត ស្ថិតនៅឃុំឈើទាល ស្រុកគៀនស្វាយ ខេត្តកណ្ដាល។

នាឱកាសទទួលទានអាហារពេលព្រឹករួមគ្នា មុនចាប់ផ្តើមការប្រកួត សម្ដេចក្រឡាហោម ស ខេង អតីតរដ្ឋមន្រ្តីក្រសួងមហាផ្ទៃ និងឯកឧត្តម វ៉ាង វិនធៀន និងសហការី បានឆ្លៀតពិភាក្សាផ្លាស់ប្ដូរយោបល់គ្នា និងរម្លឹកនូវអនុស្សាវរីយ៍ល្អៗ និងកិច្ចប្រតិបត្តិការយ៉ាងល្អជាមួយស្ថានទូតចិន ក្នុងបរិយាកាសប្រកបដោយមិត្តភាពជិតស្និទ្ធ និងមនោសញ្ចេទនាគោរពស្រលាញ់រាប់អានយ៉ាងជ្រាលជ្រៅបំផុត។

កីឡាវាយកូនហ្គោល ស្ថិតនៅក្នុងចំណោមប្រភេទកីឡាដែលសម្ដេចក្រឡាហោម ស ខេង មានចំណូលចិត្តលេងដើម្បីសុខភាព និងមិត្តភាព។ ឆ្លៀតពេលពីការបំពេញការបំរើជាតិ និងប្រជាជន សម្ដេចតែងលេងកីឡាវាយកូនហ្គោល ជាមួយឥស្សរជនថ្នាក់ដឹកនាំជាតិ និងបណ្ដាមិត្តភក្ដិបរទេស ពិសេសជាមួយឯកអគ្គរាជទូត ឯកអគ្គរដ្ឋទូតប្រចាំនៅកម្ពុជា ដែលមានចំណូលចិត្តលេងកីឡាប្រភេទនេះ។

ឯកឧត្តម វ៉ាង វិនធៀន (H.E. Mr. Wang Wentian) ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានមានប្រសាសន៍ថ្លែងអំណរគុណសម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ ដែលបានរៀបចំគំនិតផ្តួចផ្តើមនូវការប្រកួតនៅថ្ងៃនេះ ក៏ដូចជាសហការីទាំងអស់ ដែលបានរៀបចំកម្មវិធីនៅថ្ងៃនេះផងដែរ៕