ក្រុងសេអ៊ូល៖ នៅថ្ងៃព្រហស្បតិ៍១៣រោច ខែចេត្រ ឆ្នាំកុរ ឯកស័ក ពុទ្ធសករាជ២៥៦២ ត្រូវនឹងថ្ងៃទី២ ខែឧសភា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជួបពិភាក្សាទ្វេរភាគីជាមួយឯកឧត្តម ជីន យ៉ុង រដ្ឋមន្ត្រីក្រសួងមហាផ្ទៃ និងសុវត្ថិភាព នៃសាធារណរដ្ឋកូរ៉េ។

ប្រភពពីស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េបានឲ្យដឹងថាជំនួបពិភាក្សាក្នុងបរិយាកាសប្រកបដោយមិត្តភាពនេះ បានផ្ដោតជាសំខាន់ទៅលើប្រធានបទពាក់ព័ន្ធនឹងការលើកកម្ពស់សមត្ថភាពមន្ត្រីរដ្ឋបាលថ្នាក់ក្រោមជាតិ បទពិសោធន៍នៃការងារសុវត្ថិភាពចរាចរណ៍ផ្លូវគោក ការប្រឆាំងភេវរកម្ម និងការអភិវឌ្ឍសមត្ថភាពមន្ត្រីនគរបាលជាតិ។

នាឱកាសនោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៃកម្ពុជា និងឯកឧត្តម ជីន យុង រដ្ឋមន្ត្រីក្រសួងមហាផ្ទៃ និងសុវត្ថិភាព នៃសាធារណរដ្ឋកូរ៉េ ក៏បានផ្ដល់វត្ថុអនុស្សាវរិយ៍ជូនគ្នាទៅវិញទៅមកដើម្បីជាសក្ខីភាពនៃទំនាក់ទំនងប្រកបដោយមិត្តភាព និងមនោសញ្ជេតនា៕