នារសៀលថ្ងៃចន្ទ ២កើត ខែផល្គុន ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១១ ខែមីនា ឆ្នាំ២០២៤នេះ សម្ដេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ បានអញ្ជើញដាក់កម្រងផ្កា និងគោរពវិញ្ញាណក្ខន្ធឯកឧត្តម ចាន់ វ៉ែន ជាទីប្រឹក្សាជាន់ខ្ពស់រដ្ឋសភា និងជាសមាជិករណសិរ្សសាមគ្គី អភិវឌ្ឍន៍មាតុភូមិកម្ពុជា នៅគេហដ្ឋានស្ថិតក្នុងបុរីប៉េងហួតបឹងស្នោរ ផ្ទះលេខ៦ ផ្លូវH៩ គម្រោងទី៣ សង្កាត់និរោធ ខណ្ឌច្បារអំពៅ រាជធានីភ្នំពេញ។

ក្នុងសាររំលែកមរណទុក្ខ សម្តេចក្រឡាហោម ស ខេង បានផ្ញើជូនលោកជំទាវ ប៉ែន សារី ព្រមទាំងក្រុមគ្រួសារ បានបញ្ជាក់ថា ខ្ញុំ និងភរិយា មានសេចក្តីក្តុកក្តួល រន្ធត់តក់ស្លុត និងសោកស្តាយឥតឧបមា ចំពោះដំណឹងដ៏សោក សង្រេងនៃមរណភាពរបស់ ឯកឧត្តម ចាន់ វ៉ែន ជាទីប្រឹក្សាជាន់ខ្ពស់រដ្ឋសភា និងជាសមាជិករណសិរ្ស សាមគ្គី អភិវឌ្ឍន៍មាតុភូមិកម្ពុជា ដែលឯកឧត្តមបានទទួលមរណភាព នាថ្ងៃសៅរ៍ ១៤រោច ខែមាឃ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៩ ខែមីនា ឆ្នាំ២០២៤ វេលាម៉ោង៥:២០នាទីព្រឹក ក្នុងជន្មាយុ ៨៨ឆ្នាំ ដោយជរាពាធ។

មរណភាពរបស់ ឯកឧត្តម ចាន់ វ៉ែន មិនត្រឹមតែជាការបាត់បង់ដោយសេចក្តីអាឡោះអាល័យជា ទីបំផុតនូវស្វាមី ឪពុក និងជីតា ជាទីគោរពស្រលាញ់ដ៏ជ្រាលជ្រៅរបស់លោកជំទាវ និងក្រុមគ្រួសារប៉ុណ្ណោះទេប៉ុន្តែក៏ជាការបាត់បង់នូវឥស្សរជនជាន់ខ្ពស់មួយរូបរបស់ជាតិ ដែលធ្លាប់បានចូលរួមចំណែកក្នុងចលនាតស៊ូ រំដោះជាតិមាតុភូមិ និងធ្វើពលិកម្មក្នុងបុព្វហេតុស្តារ កសាង និងអភិវឌ្ឍសង្គមជាតិ អស់រយៈពេលជាច្រើន ទសវត្សកន្លងមក ។

ស្ថិតក្នុងវេលាដ៏សង្វេគក្រៀមក្រំពុំអាចរកអ្វីប្រៀបផ្ទឹមបាននេះ ខ្ញុំ និងភរិយា សូមចូលរួមរំលែកនូវ មរណទុក្ខជាមួយលោកជំទាវ ព្រមទាំងក្រុមគ្រួសារ និងសូមឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ចាន់ វ៉ែន សូមបានទៅកាន់ឋានបរមសុខក្នុងសុគតិភពកុំបីឃ្លៀងឃ្លាតឡើយ ៕