នាព្រឹកថ្ងៃអង្គារ ១៥រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២១ ខែមីនា ឆ្នាំ២០២៣នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមដង្ហែព្រះករុណាជាអម្ចាស់ជីវិតលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចកក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត យាងជាព្រះរាជាធិបតីក្នុងព្រះរាជពីធីប្រោសព្រះរាជទានព្រះអគ្គិជ័យកីឡា និងពិធីរត់ភ្លើងគប់កីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២។

ព្រះរាជពីធីដ៏មហាសិរីសួស្ដីជាប្រវត្តិសាស្ត្រនេះ បានប្រារព្ធឡើងនៅមុខប្រសាទអង្គរវត្ត ខេត្តសៀមរាប ដោយមានការអញ្ជើញចូលរួមពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា សម្ដេច ទ្រង់ ឯកឧត្តម លោកជំទាវ ជាព្រះញាតិវង្សានុវង្ស ឥស្សរជនជាថ្នាក់ដឹកនាំស្ថាប័នព្រឹទ្ធសភា រដ្ឋសភា រាជរដ្ឋាភិបាល ស្ថាប័នតុលាការ ក្រសួងព្រះបរមរាជវាំង គណៈកម្មាធិការជាតិអូឡាំពិកកម្ពុជា ថ្នាក់ដឹកនាំ CAMSOC ភ្ញៀវអន្តរជាតិ និងកីឡាករ កីឡាការិនីជាតិ ព្រមទាំងមហាជនជាតិ និងភ្ញៀវទេសចរណ៍អន្តរជាតិយ៉ាងច្រើនកុះករ។

កម្ពុជា នឹងប្រារព្ធព្រឹត្តិការណ៍កីឡាអាស៊ីអាគ្នេយ៍លើកទី៣២ ចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣នេះ ហើយព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ នឹងបន្តប្រារព្ធឡើងបន្ទាប់ពីបញ្ចប់ព្រឹត្តិការណ៍នេះ។ បន្ទាប់ពីទទួលការប្រោសព្រះរាជទានព្រះអគ្គិជ័យកីឡា និងពិធីរត់ភ្លើងគប់កីឡានាថ្ងៃនេះ អត្តពលិកជាតិ នឹងរត់ដង្ហែព្រះអគ្គិជ័យកីឡាឆ្ពោះទៅកាន់បណ្ដាប្រទេសតំបន់អាស៊ីអាគ្នេយ៍ ហើយវិលមកដង្ហែព័ទ្ធជុំវិញតំបន់បឹងទន្លេសាបបន្តរហូតចូលមកាន់រាជធានីភ្នំពេញ នាថ្ងៃបើកព្រឹត្តិការណ៍នៅពហុកីឡាដ្ឋានជាតិមរតកតេជោតែម្ដង៕