នារសៀលថ្ងៃព្រហស្បតិ៍ ៧រោច ខែមិគសិរ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១៥ ខែធ្នូ ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានអញ្ជើញគោរពវិញ្ញាណក្ខន្ធសពលោកឧកញ៉ា សេង ឆាយអ៊ួរ ដែលបានទទួលមរណភាព កាលពីថ្ងៃទី១៤ ខែធ្នូ ឆ្នាំ២០២២ ក្នុងជន្មាយុ៨០ឆ្នាំ ដោយរោគាពាធ។

សម្ដេចក្រឡាហោម ស ខេង និងលោកជំទាវ បានចូលរួមរំលែកមរណទុក្ខជាមួយលោកជំទាវ កាំង ហ្គេចណៃ ដែលត្រូវជាភរិយា និងក្រុមគ្រួសារ ចំពោះការបាត់បង់ដ៏ធំធេងនូវឪពុក និងជីតា ជាទីគោរពស្រលាញ់ដ៏ជ្រាលជ្រៅ ប្រកបដោយព្រហ្មវិហារធម៌ដ៏ថ្លៃថ្លាបំផុត។

សម្ដេចក្រឡាហោម បានមានប្រសាសន៍ថា មរណភាពលោកឧកញ៉ា សេង ឆាយអ៊ួរ ក៏ជាការបាត់បង់នូវសប្បុរសជន និងពាណិជ្ជករមួយរូបដែលបានចូលរួមចំណែកក្នុងសកម្មភាពសង្គម និងមនុស្សធម៌ បម្រើដល់ឧត្តមប្រយោជន៍សង្គមជាតិ និងប្រជាជន។

សម្ដេចក្រឡាហោម ស ខេង នាឱកាសនោះ ក៏បានបួងសួងដល់ដួងវិញ្ញាណក្ខន្ធលោកឧកញ៉ា សេង ឆាយអ៊ួរ បានទៅកាន់ទីឋានបរមសុខក្នុងសុគតិភពកុំបីឃ្លៀងឃ្លាតឡើយ៕