នាព្រឹកថ្ងៃសៅរ៍ ២រោច ខែមិគសិរ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី១០ ខែធ្នូ ឆ្នាំ២០២២នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញចូលរួមជាគណៈអធិបតីពិធីបើកមហាសន្និបាតលើកទី១៦ របស់ក្លឹបឆ្នេរសមុទ្រដែលស្អាតបំផុតលើសាកលលោក ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅសណ្ឋាគារឆ្នេរសុខា ក្រុងព្រះសីហនុ ខេត្តព្រះសីហនុ។

ពិធីបើកមហាសន្និបាតលើកទី១៦ របស់ក្លឹបឆ្នេរសមុទ្រដែលស្អាតបំផុតលើសាកលលោក មានការអញ្ជើញចូលរួមពីឯកឧត្តម Bruno BODARD សហស្ថាបនិកក្លឹបឆ្នេរសមុទ្រដែលស្អាតជាងគេបំផុតលើសកលលោក, ឯកឧត្តម Michel BUJOLD ប្រធានក្លឹបឆ្នេរសមុទ្រដែលស្អាតជាងគេបំផុតលើសកលលោក ព្រមទាំងមានការអញ្ជើញចូលរួមពីមន្ត្រីនៃរាជរដ្ឋាភិបាលកម្ពុជា ភ្ញៀវជាតិ និងអន្តរជាតិ ប្រតិភូក្លឹបឆ្នេរសមុទ្រស្អាតជាងគេលើសាកលលោក និងមន្ត្រីពាក់ព័ន្ធជាច្រើនទៀត។

សូមបញ្ជាក់ថាកម្ពុជាកំពុងរៀបចំពិធីបុណ្យសមុទ្រ និងសន្និបាតពិភពលោកឆ្នាំ២០២២ នៃឆ្នេរសមុទ្រស្អាតបំផុតក្នុងក្លឹបពិភពលោក (World-Bays Club) នៅខេត្តព្រះសីហនុ ពីថ្ងៃទី៨ ដល់១៤ ខែធ្នូ។ ឆ្នេរសមុទ្ររបស់ព្រះរាជាណាចក្រលាតសន្ធឹងប្រហែល៤៥០ គីឡូម៉ែត្រក្នុងខេត្តចំនួន៤ គឺខេត្តព្រះសីហនុ កោះកុង កំពត និងកែប។ និងបានក្លាយជាសមាជិកនៃក្លឹប World-Bays នៅពាក់កណ្តាលឆ្នាំ២០១១៕